Komiteti Teknik i Ekspertëve, në mbledhjen urgjente që zhvilloi këtë të hënë, ka vendosur të mos ndryshoj masat e vendosura për pandeminë e COVID-19.
Komiteti i Ekspertëve vlerësoi që mos të ndryshoj masat, reflektuar edhe nga situata epidemiologjike dhe shtrimet në spitale që sipas tyre janë të qëndrueshme.
Zv. ministrja e Shëndetësisë, Mira Rakacolli, tha se personat e infektuar nuk kanë bërë asnjë dozë të vaksinës, e kjo shihet si shkaku kryesor i shtimit të numrit të rasteve. Megjithatë, ajo theksoi se situata në vend aktualisht është e qëndrueshme.
“Siç u bë i qartë, u vu re që ka një numër në rritje të rasteve. Shtrimi në spital mbetet në nivele të qëndrueshme, ajo çka është më e rëndësishme është që numri i rasteve të shtruara të sëmurëve rëndë, janë persona që s’janë vaksinuar. Rastet po rriten në komunitetin që mbeten të pavaksinuar.”, tha Mira Rakacoli.
Po ashtu profesor Dhimitër Kraja, ka dhënë një shpjegin se si po vijon situata me pandeminë. Ai ka theksuar se nuk ka pacientë që janë të vaksinuar më parë të shtruar dhe se mosha e personave që janë të shtruar vazhdon të jetë mbi 69 vjeç.
“Në spitalin COVID-1 ndodhen 9 pacientë, gjendja e tyre është e kënaqshme pavarësisht se ka diferenca.
Nuk ka pacientë që janë vaksinuar më parë apo kanë kaluar sëmundjen, me përjashtim të një rasti, që ka bërë vetëm një vaksinë dhe atë e ka ndërprerë nuk e ka bërë dozën e dytë. Mosha vazhdon që të jetë mbi 69-72 vjeç. Situata është e mirë, nuk kemi pasur raste shumë të rënda, nuk ka pasur vdekje”, është shprehur Dhimitër Kraja.
