Publicisti Veton Surroi ka analizuar periudhën katërvjeçare të qeverisjes së kryeministrit Albin Kurti, duke theksuar disa elemente kryesore.
Ai e konsideron të rëndësishëm faktin se ky është mandati i parë i plotë katërvjeçar në historinë e qeverisjes së Kosovës, duke e cilësuar si një fazë të re të stabilitetit politik në vend.
“Ajo çka mund të thuhet është se ky është mandati i parë që përmbyllet në katër vite. Është mandati i parë i plotë. Dhe kjo demonstron një fazë të re në zhvillim politik të Kosovës. D.m.th. ka një stabilitet politik të cilin Kosova nuk e ka pasur. Stabilitet natyrisht relativ brenda kushteve të cilave gjendemi”, ka thënë Surroi.
Surroi vlerësoi gjithashtu forcimin e pranisë së shtetit në të gjithë territorin e Kosovës, duke e cilësuar këtë si një hap të rëndësishëm për konsolidimin e sovranitetit dhe përmirësimin e funksionimit të shtetit.
“Elementi i dytë është që kemi gjatë kësaj periudhë, forcim të pranisë të shtetit të Kosovës në tërë territorin e vendit si një element pozitiv”, ka shtuar Surroi.
