Ndërtimi i Portit të Durrësit është një temë që ka ngjallur debat dhe polemika kohët e fundit.
Në lidhje me Portin e Durrësit i konsideruar si investim strategjik, gazetari Klodian Tomorri në studion e emisionit “Të Paekspozuarit” ka treguar skepticizmin e tij.
Sipas tij, hotelet në Portin e Durrësit zënë një një pjesë të papërfillshme teksa biznesmenë shqiptarë kanë ndërtuar hotele të këtij rangu, pa patur favoret që ka projekti i mbështetur nga qeveria, si toka falas përjashtimin nga taksat etj.
“Në Durrës ndërtohet mesatarisht 150-200 mijë metër katrorë në vit, rezidenciale, biznesi, hotele etj. Ky projekt i vetëm ka 1.4 milionë metër katrorë ndërtim, pra gjithë sipërfaqet që ndërtohet në Durrës për 7 vite. Pra është monopolizimi i gjithë sipërfaqes ndërtimore në një dorë të vetme. Do të ketë kulla deri në 18 kate dhe, siç duket nga planet, ky është një projekt i drejtuar drejt real estate, shitjes së apartamenteve, do të ketë vetëm dy hotele që zënë rreth 47 mijë metër katrorë ndërtim, nga 1.4 milionë metër ndërtimi sa është projekti, pra vetëm 3.3 për qind janë sipërfaqe hoteli dhe me aq i është vënë emri “projekt strategjik”. Sot ke resorte që janë ndërtuar nga biznesmenë shqiptarë, që kanë hotele me nga 600 dhoma, afërsisht sa ky që premtohet, që kanë sjellë edhe marka të njohura dhe nuk kanë patur këto favore që ka ky projekt. Pra nuk kanë përfituar tokën falas, nuk janë përjashtuar nga taksat. Për të ardhur më pas te pastrimi i parave, ku sektori i ndërtimit është kryesori dhe një projekt i tillë ka rrisqe të shumta dhe aty mund të gjenerohen paratë që vijnë nga burime të jashtëligjshme”, u shpreh Tomorri.
Vlen të theksojmë seprojekti për ndërtimin e kësaj vepre u miratua me procedurë të përshpejtuar në Paralament nga qeveria dhe kjo i dha shkasë një teme të madhe debatesh dhe denoncimesh në lidhje me të.
