Dosja e SPAK ndaj organizatës kriminale të drejtuar nga Suel Çela ka zbuluar ndikimin e gjerë të këtij grupi kriminal mbi gjyqtarë, policë, gazetarë dhe figura të tjera, por deri më tani nuk përfshin emra politikanësh.
Gazetarja Klodiana Lala ka deklaruar se kjo mund të ndryshojë, pasi hetimet janë të ndara në faza dhe disa detaje janë ende të fshehura.
Sipas Lalës, dosja përmban fraksione të veçanta dhe shumë nga kodet (PIN) janë anonime, duke kërkuar kohë për t’u dekriptuar dhe identifikuar.
Aktualisht, vetëm ish-deputeti socialist Jurgis Cyrbja është arrestuar, por jo për këtë dosje.
Një tjetër pistë hetimi lidhet me vrasjen e avokatit Ravik Gura, i cili u vra pasi kishte siguruar dosjen e masakrës së 3 shkurtit 2016 ndaj familjes Çapja.
Kjo vrasje ka ngritur dyshime për përfshirje politike, çka mund të thellojë hetimet ndaj figurave të larta.
SPAK ka dërguar letërporosi ndërkombëtare për të marrë të dhëna shtesë nga komunikimet SKY ECC dhe për të kryqëzuar informacionet.
Sipas Lalës, serverët e këtij rrjeti janë në Francë, çka garanton integritetin e të dhënave dhe pamundësinë e manipulimit nga autoritetet shqiptare.
Faza e dytë e hetimeve pritet të përfshijë emra të rinj, përfshirë zyrtarë të lartë, politikanë dhe njerëz të biznesit, duke hapur një kapitull të ri në luftën kundër krimit të organizuar.
