Kandidatja e PD për deputete, Grida Duma ka treguar detaje të reja nga plagosja që ndodhi në Kavajë gjatë muajit të kaluar në zyrën elektorale të demokratëve. Duma tha në “Ilva Noë” në Euronews se nëse pasojat do të ishin më të rënda, nuk dihej çfarë do të ndodhte me zgjedhjen.
Ajo tregoi se në momentin që ka mbërritur në vendngjarje, policia donte të hiqte kordonin policor për të mos e quajtur skenë krimi. Më tej Duma tha se personi që plagosi sekretarin e PD ishte dënuar më parë për armëmbajtje pa leje dhe ka plagosur një njeri. Për Dumën, nëse policiadhe organet e drejtësisë janë në këtë gjendje, atëherë duhet vënë alarmi.
“Po ta them me shumë sinqeritet, nëse Bledit (të plagosurit) do t’i kishte ndodhur gjë me jetën, unë nuk e di se si mund të vazhdoheshin zgjedhjet. Është e vështirë shumë të humbësh një anëtar të partisë, sekretar apo një djalë të mirë.
Kjo është një ngjarje shumë e keqe. Kam shumë për të thënë për forcat e policisë. Unë isha aty në rastin e plagosjes. Sa më thanë nuk e besova dhe thashë mos po e ekzagjerojnë. Shkova direkt, as 6 minuta nuk jam vonuar dhe shikoj policinë që po e rrethonte.
E gjithë policia ishte e ngrirë pasi në ngjarje kishin marrë pjesë Drejtori i Policisë Bashkiake me një polic tjerë bashkë me një biznesmen që rrinte me kryetarin e bashkisë. Ata nuk dinin si të vepronin, ishin të pavendosur dhe të paqartë. Dy policët janë me arrest shtëpie. Pas një ore që unë vazhdoja të qëndroja aty, në moment të fundit deshën të hiqnin edhe kordonin e policisë për të mos e quajtur skenë krimi.
E di ti që ai djali që plagosi është dënuar për armëmbajtje pa leje. Më thuaj çfarë të themi. Ai ka plagosur një njëri edhe ai është kapur për armëmbajtje pa leje. Nëse policia është në këtë gjendje dhe organet e drejtësisë janë në këtë gjendje ne duhet të vëmë alarmin”, tha Duma.
