Ditën e djeshme, prestigjiozja “The Sun” raportoi se këngëtarja me origjinë shqiptare, Dua Lipa kishte thyer rregullat e qeverisë britanike për kufizimin e lëvizjeve në kuadër të frenimit të Covid -19.
Pasi të enjten në mbrëmjen Dua dhe ekipi i saj dolën në sheshin lindor të Londrës për të xhiruar klipin e saj të ri muzikor, por duket se gjërat nuk shkuan aq mirë sa i kishin menduar, pasi disa banorë të zonës njoftuan policinë për zhurmën që grupi i Duas po bente.
Por ditën e sotme 25-vjeçarja shqiptare ka hedhur poshtë fjalët se xhirimet ishin ndërprerë për këtë fakt, teksa bën të ditur se avokatët e saj kanë kontaktuar tashmë me gazetën.
“Një gazetë tabloide në Mbretërinë e Bashkuar (së cilës nuk do t’i bëj reklamë falas duke e përmendur), natën e kaluar publikoi një artikull rreth xhirimeve të videos time në Londër duke thënë se janë shkelur rregullat kundër Covid. Kjo është plotësisht e pavërtetë, absolutisht të gjitha udhëzimet janë respektuar. Kjo është një nga shumë historitë e pavërteta të botuara nga kjo gazetë për mua këtë vit. Avokatët e mi i kanë dërguar një letër gazetës sot.
Është për të ardhur keq se një pjesë e shtypit britanik kërkojnë vëmendje për të shitur artikuj sesa të flasin për të vërtetën apo për ndjenjat e personit për të cilin shkruajnë. Ka patur shembuj jo të mirë vitin e fundit duke përfshirë personazhe të njohur britanikë, por unë do ta mbaj qëndrimin tim.“, ka shkruar Dua.
