Policia ka bërë të ditura detaje të reja rreth sasisë së kokainë së sekuestruar ditën e djeshme në portin e Durrësit. Pas përfundimit të peshimit, rezultoi se ka qenë në total 324 kilogramë e 400 gramë kokainë.
Aktualisht po vijon puna për identifikimin e personave të tjerë të përfshirë në këtë vepër penale. Ndërkohë, ditën e djeshme u arrestua shoferi i kamionit ku u gjet kokaina, Nazif Ajroski nga Maqedonia e Veriut. Ai deklaroi se nuk ishte në dijeni për kokainën që gjendej në mjetin që ai drejtonte. Kamioni ishte nisur nga Maqedonia e Veriut dhe destinacioni i lëndës narkotike ishte Italia.
Njoftimi i policisë:
DVP Durrës
Në vijim të informacionit të dhënë ditën e djeshme, ku nga Task Forca permanente e përbashkët e përbërë nga Policia Kufitare e Portit të Durrësit, Policia Kriminale e DVP Durrës dhe autoritet doganore të Portit, u sekuestrua një sasi e madhe lëndë narkotike kokainë, ju informojmë se:
Në vijim të punës së kryer nga grupi hetimor, pas përfundimit të peshimit të pakove me kokainë, rezultoi se pesha totale është 324 kilogramë e 400 gramë.
Grupi hetimor nën drejtimin e Prokurorisë së Rrethit Gjyqësor Durrës, vijon punën hetimore në bashkëpunim dhe me autoritetet policore të Maqedonisë së Veriut për zbardhjen, dokumentimin, identifikimin dhe kapjen e personave të tjerë të përfshirë në këtë veprimtari kriminale.
