Një 45-vjeçar shqiptar, në kërkim prej nëntorit 2024, u arrestua nga autoritetet italiane në aeroportin Malpensa të Milanos, sapo kishte mbërritur nga Shqipëria.
Ai dyshohet për përfshirje në një organizatë kriminale ndërkombëtare që merrej me trafik droge dhe pastrim parash.
Sipas Policisë së Shtetit italiane, shqiptari kishte arritur t’i shpëtonte ekzekutimit të një urdhër-arresti gjatë operacionit të koduar “Moby Dick”, një aksion i gjerë që çoi në lëshimin e 43 masave sigurie ndaj anëtarëve të një grupi kriminal të shpërndarë në disa shtete europiane, si edhe në Dubai dhe Singapor.
Hetimet treguan se organizata, në të cilën i arrestuari kishte rol drejtues, funksiononte si një rrjet i strukturuar ndërkombëtar me veprimtari të dyfishtë, trafik të lëndëve narkotike dhe mashtrime të sofistikuara në skemat e rimbursimit të TVSH-së brenda Bashkimit Evropian.
Dëmi i shkaktuar ndaj buxheteve shtetërore kap vlerën e rreth 600 milionë eurove.
Përveç akuzave për trafik droge, 45-vjeçari përballet edhe me akuza për mashtrim financiar dhe pastrim parash, të kryera në rrethana të rënduara, përfshirë përdorimin e metodave mafioze dhe lidhjet me strukturat e tipit kamorrë.
Arrestimi i tij u realizua falë një operacioni të përbashkët mes Shërbimit Qendror të Operacioneve të policisë italiane dhe Guardia di Finanza në Varese, duke shënuar një goditje të rëndësishme ndaj krimit të organizuar ndërkombëtar.
