Një muaj pas incidentit tronditës në protestën e banorëve të zonës së Astirit, ku ajo humbi dy gishta të dorës si pasojë e shpërthimit të një kapsolle, efektivja Ina Nuka është rikthyer në Tiranë.
Pas trajtimit të specializuar në Ankara të Turqisë ku iu nënshtrua një operacioni të vështirë për rindërtimin e njërit gisht, Nuka ka mbërrotur në Rinas mbrëmjen e djeshme, ku ka dhënë dhe një intervistë të shkurtër për mediat.
“Policia është ëndrra ime, nuk do tërhiqem kurrë, çka më ndodhi më ka bërë më të fortë, më të motivuar. Ndjehem e përulur para gjithë shqiptarëve të cilët u bënë pjesë me mesazhet e tyre.”-është shprehur ajo, duke shtuar më tej se nuk mban mëri me askënd. “Unë jam punonjëse Policie, isha duke bërë detyrën dhe zbatuar ligjin, s’kam asnjë mëri personale me askënd, për cilindo që shkel ligjin, të veprojë ligji. Dua të përcjell një mesazh, të mos reflektojmë dhunë, të mbrojmë jetën e ta duam më shumë atë. Kurrë s’do heq dorë nga Policia, pasi jam privuar nga shumë gjëra të tjera për të realizuar ëndrrën time, të jem pjesë e Policisë së Shtetit”, tha Nuka.
Efektivja u prit në Rinas nga nga zv/ministrja e Brendshme, Romina Kuko, drejtori i Përgjithshëm i Policisë së Shtetit, Ardi Veliu, drejtori i Departamentit për Sigurinë, Gjovalin Loka, zv/drejtori për Rendin në DVP Tiranë, Dhimitraq Ziu, drejtues të tjerë të lartë të Policisë, kolegë, miq e të afërm.
(Balkanweb)
