Policia e Shtetit ka nisur kërkimet në të gjithë vendin për autorët e vrasjes mafioze të Shkëlzen Kastratit në dalje të Fierit pak ditë më parë. Gjatë natës janë zhvilluar aksione në Fier, Durrës e Tiranë dhe janë kontrolluar banesat e personave të dyshuara për vrasjen e e 42-vjeçarit.
Deri tani për vrasjen e Shkëlzen Kastratit janë shoqëruar disa persona të dyshuar. Ngjarja ndodhi në 1 shkurt në të dalë të Fierit në vendin e njohur si “Rotondoja e Sheqit”. Nga hetimet është zbuluar se autori i vrasjes përdori “Scorpion” për ta vrarë teksa 42-vjeçari qarkullonte me mjetin e tij tip “Mercedes Benz”, ku edhe u gjet pa shenja jete një orë më vonë.
Nga ana tjetër policia gjeti një mjet ”Land Rover” me targa greke të djegur në afërsi të vendit të ngjarjes, që dyshohet se u përdor nga autori. Nga ana tjetër u sekuestrua dhe arma e përdorur, bashkë me një silenciator. Mendohet se ekzekutimi mafioz ndodhi për konflikte të vjetra që 42-vjeçari Kastrati mund të ketë pasur në të shkuarën. Gjithashtu ka dyshime se vrasja mund të jetë një mesazh për vëllain e viktimës, Klementin, nisur nga përplasja e vjetër mes familjeve Binjaku dhe Kastrati.Një atentat i ngjashëm iu bë Klement Kastratit tek Ura e Mbrostarit në Fier në vitin 2016, por plumbat i morën jetën shokut të tij, Denis Kasaj.
