Pak ditë më parë një video ku 4 policë dhunuan një 15 vjeçar në zonën e Liqenit, u përhap në media, pasi dhuna ndaj të miturit ishte e paprecedentë.
15-vjeçari po lëvizte me biçikletë, ndërsa është ndaluar nga policët të cilët i kanë kërkuar llogari pse ka shkelur orarin që vendosi qeveria në periudhën e karantinimit gjatë pandemisë dhe ushtruan dhunë ndaj tij.
Nëna e 15-vjeçarit, pas publikimit të videos bëri edhe denoncimin në polici, për dhunën e ushtruar ndaj djalit të saj.
Ndërsa ditën e sotme drejtori i Përgjithshëm i Policisë , Ardi Veliu ka nxjerrë një video të nënës së të miturit të dhunuar pak ditë më parë në zonën e Liqenit.
Veliu ka qenë i pranishëm në një lidhje “live” nga zyra e tij në Komisionin e Sigurisë ku edhe ka dhënë shifra lidhur me situatën në vend.
Në një moment, Veliu është pyetur edhe për dhunimin e 15-vjeçarit, ku në këtë moment ka nxjerrë një video të nënës së djalit, e cila shfaqej me armë në dorë.
“Punonjësit e policisë në një moment kanë një kapërcim të kompetencës.
Ai që ka dhunuar është pezulluar dhe ka hetim nga SHÇBA. Po ky djali çfarë përfaqëson? A është bindur ai ndaj policisë?
Do t’ju shfaq një video. Shikoni nga çfarë familjë vjen ky fëmijë. Ma treguan këtë video, për të treguar se sa i edukuar është ky fëmijë. Nuk dua të justifikohem më.
Jo se dua të mbroj Policinë. Por të jemi realistë,”-tha Veliu.
Edhe pse Veliu foli, nuk sqaroi se cila është lidhja e edukimit të djalit, videove që bën nëna e tij në kohën e saj të lirë, me dhunën që policia ushtroi tek i mituri.
