Kreu i Urgjencës Kombëtare, Skënder Brataj ka thënë se situate e Covid-19 duket të jetë nën kontroll. Në një intervistë për Abc News, Brataj tha se pasojat e grumbullimeve në fushatë kanë filluar të ndihen, ndërsa është rritur numri i shtrimeve në spitale, por pacientët qëndrojnë më pak.
“Në këtë moment kërkohen 6-7 apo 10 tamponë që kërkohen. Ka një rritje të vogël, sot janë rreth 14 shtrime midis spitaleve Covid të kryeqyteti dhe atyre rajonale. Por qëndrimi është më i shkurtër dhe korrespondon me atë numër të ulët që rezulton akoma në spitalet”, tha Brataj.
Kreu i Urgjencës ka bërë apel për kujdes, ndërsa tha se nga 15-20 maji situate do të jetë në monitorim për arsyen e grumbullimeve në fushata.
“Kujdesi duhet të jetë dhe monitorimi vazhdon çdo ditë. Sidomos nga 15-20 maji do të jetë në kontroll për arsye të grumbullimit të njerëzve në fushata elektorale”, u shpreh Brataj.
Brataj dha edhe lajmin e mirë se masat kufizuese janë do të rishikohen dhe se sa më shumë vaksinime të ketë, aq më shpejt ato do të eliminohen.
“Po vlerësohen të gjitha masat dhe kuptohet që janë paralele dhe graduale. Sa më shumë të vaksinuar të kemi aq më shpejt do të shkojmë drejt eliminimit të masave që janë, kuptohet një nga një. Maskat, oraret, ora policore, aktivitetet e ndryshme, bizneset, lokalet, festat do të shihen të gjitha me radhë”, deklaroi Brataj.
