Dy persona janë arrestuar nga Policia e Tiranës pasi u kapën në flagrancë duke transportuar lëndë narkotike me një automjet.
Në pranga kanë rënë Enea Tahiri, 37 vjeç, dhe Besnik Shabani, 48 vjeç, të dy banues në Tiranë. Ata akuzohen për veprën penale “Prodhimi dhe shitja e narkotikëve”, kryer në bashkëpunim.
Operacioni u zhvillua në bazë të informacioneve të siguruara nga inteligjenca policore. Shërbimet e Policisë ndaluan një automjet në aksin rrugor “Mamurras–Kashar”, në zonën e Thumanës.
Gjatë kontrollit, në mjetin që drejtohej nga Tahiri dhe kishte pasagjer Shabanin, u gjetën 59 pako me lëndë narkotike të dyshuar si kanabis, me një peshë totale prej 60 kilogramë e 6 gramë.
Dyshohet se droga po transportohej për qëllime shpërndarjeje. Policia sekuestroi pakot me lëndë narkotike dhe automjetin e përdorur në këtë veprimtari.
Hetimet janë në vijim për të zbardhur tërësisht rrjetin dhe për të identifikuar persona të tjerë të përfshirë në këtë aktivitet kriminal.
Materialet i janë referuar Prokurorisë së Tiranës për veprime të mëtejshme.
