Një 25-vjeçar është arrestuar në flagrancë, teksa po konsumonte kokainë.
Ngjarja u regjistrua në një lokal tallavaje në zonën e Shkozetit në Durrës.
Policia ka dyshime se E.K. përveçse konsumues, është edhe shpërndarës i lëndës narkotike.
Në cilësinë e provës materiale u sekuestruan disa doza kokainë, dhe disa kartëmonedha në formë tubi, me anë të cilave ishte konsumuar lënda narkotike.
Gjithashtu u procedua në gjendje të lirë edhe pronari i lokalit, 27-vjeçari S.M.
Njoftimi i policisë
Durrës
Policia e Durrësit godet një rast të prodhimit dhe shitjes së lëndëve narkotike në lokalet e natës, tallava.
Vihet në pranga një shtetas, I cili dyshohet se konsumonte dhe shpërndante lëndë narkotike në lokalet e natës.
Procedohet penalisht edhe pronari i lokalit, i cili kishte përshtatur ambjentet për përdorim të lëndëve narkotike.
Specialistët për Hetimin e Narkotikëve në Drejtorinë Vendore të Policisë Durrës, në zbatim të planit për kontrollin e elementëve kontingjent në lokalet e natës, në bazë të informacioneve të siguruara në rrugë operative se në zonën e Shkozetit, janë përshtatur lokale për përdorim droge si dhe shpërndahet dhe konsumohet lëndë narkotike, mbrëmjen e djeshme është ushtruar kontroll ku është konstatuar një rast i drogave të forta.
Si rezultat është vënë në pranga shtetasi E.K., 25 vjeç, banues në Durrës, për veprën penale “Prodhimi dhe shitja e narkotikëve” dhe u procedua në gjendje të lirë pronari i lokalit, shtetasi S.M., 27 vjeç, banues në Durrës, për veprën penale ” Përshtatja e lokalit për përdorim droge”.
Gjatë kontrollit të ushtruar në lokalin në pronësi të shtetasit S.M., i cili kishte përshtatur ambjentet për konsumim të lëndëve narkotike, në tavolinën e shtetasit E.K., u gjetën dhe sekuestruan në cilësinë e provave materiale doza lënde narkotike e dyshuar e llojit kokainë, një kapak metalik me mbetje të lëndës narkotike dhe kartëmonedha në formë tubi, me anë të cilave ishin konsumuar lëndë narkotike.
Materialet i kaluan Prokurorisë së Rrethit Gjyqësor Durrës për veprime të mëtejshme.
