Një aksident ka ndodhur mëngjesin e sotëm rreth orës 07:15 në aksin Levan Tepelenë, në fshatin Buzmadh. Drejtuesi i automjetit ka humbur kontrollin dhe ka dalë nga rruga, por fatmirësisht pa pasoja fatale. Ai tashmë ndodhet në spital nën kujdesin e mjekëve.
Mësohet se në makinë ka qenë një familje me katër anëtarë, një çift bashkëshortësh së bashku me dy djemtë e tyre. Ata ishin duke udhëtuar në drejtim të Fierit pasi ishin kthyer nga Greqia. Dyshimet paraprake për aksidentin janë se drejtuesi i mjetit mund të ketë qenë i përgjumur në timon, por grupi hetimor është ende duke punuar për zbardhjen e rrethanave të ngjarjes.
Njoftimi i policisë:
Sot rreth orës 07:15, aksin rrugor Levan-Tepelenë, në fshatin Buzmadh, shtetasi M. H., 46 vjeç, banues në Patos, duke drejtuar automjetin tip “Honday” ka dalë nga rruga dhe për pasojë është dëmtuar drejtuesi i mjetit i cili ndodhet në spitalin e Fierit nën kujdesin e mjekëve. Grupi hetimor ndodhet në vendngjarje dhe po punon për zbardhjen e shkakut të daljes së mjetit nga rruga.
Në videon e publikuar shihet ambulanca që ka shkuar për të marrë personat që u përfshinë në aksident, ndërsa familjarët janë në gjendje shoku, ndërsa njerëz të tjerë që janë aty afër mundohen t’i qetësojnë.
