Pas Partisë Demokratike të Kosovës, edhe LDK-ja ka kërkuar rinumërim të votave.
Ky subjekt politik pretendon se ka ndodhur një gabim teknik me formularët e KQZ-së.
Kështu është shprehur kandidati për deputet i LDK, Florian Dushi, për gazetën “Express”.
“Ne kemi kërkuar rinumërim në shkallë vendi. Se gabimi ka ndodhur në shkallë vendi. Pra në të gjithë Kosovën. Fjala është për një gabim teknik por që mund të ndikojnë në rezultatin e zgjedhjeve. Gjatë përshkrimit të rezultateve në formular ka pas lëvizje të renditjeve të partive. Ne kemi kërkua me u rinumërua votat edhe me u përshkrua në formularët e rinj”, ka deklaruar anëtari i shtabit zgjedhor të LDK-së, Florian Dushi.
Gjithashtu në Panelin Zgjedhor për Ankesa dhe Parashtresa është ankuar edhe Nisma e fatmir Limajt, si dhe PDK e Kadri Veselit.
Konfirmimi është bërë nga kreu i PZAP, Mul Desku.
“Mund të ju konfirmoj se i kemi marrë tri ankesa, pra LDK, PDK dhe NISMA. Ata po thonë që ka pasur parregullsi që i kanë evidentuar. Ata kanë dorëzuar ankesa që m’i korrigjua ato parregullsi. Pretendimet e tyre janë se në kolonat ku ata kanë qenë të sigurt që kanë pasur vota i janë deleguar një subjekti tjetër politik”, ka deklaruar Desku.
Tashmë kur kanë mbetur më pak se 2% e votave për t’u numëruar, kryeson Lëvizja Vetëvendosje me kryetar Albin Kurtin, e ndekur nga LDK-ja e Vjosa Osmanit.
Kurse PDK-ja e Kadri Veselit ka pranuar humbjen, duke thënë se kjo forcë politike do të shkojë në opozitë.
