Gazetari Bledian Koka ka zbuluar së fundmi emrat e tre personave që janë nën hetim nga Prokuroria e Posaçme Kundër Korrupsionit dhe Krimit të Organizuar (SPAK). Sipas tij, materialet hetimore për këta persona janë hakeruar përmes email-eve të prokurorëve të posaçëm dhe u janë dërguar disa gazetarëve.
Në një deklaratë publike, Koka përmendi se personat e hetuar janë ish-ministri dhe deputeti socialist Damian Gjiknuri, pronari i “Spitalit Amerikan” Klodian Allajbeu dhe Ornela Imeraj, e konsideruar si njeri i afërt i Allajbeut.
Ai ngriti gjithashtu dyshime mbi veprimet e SPAK-ut, duke argumentuar se ky institucion urdhëroi menjëherë mediat të mos publikojnë këto dosje të hakeruara, ndërkohë që lejoi publikimin e përgjimeve nga burgu të kryebashkiakut të Tiranës, Erion Veliaj. Kjo, sipas tij, dëshmon se SPAK-u po përdoret në konfliktin e brendshëm midis grupeve rivale brenda Partisë Socialiste.
“Institucioni i pavarur i organit të akuzës së Strukturës së Posaçme Anti-Korrupsion, brenda një dite ka marrë një vendim dhe s’ka marrë një vendim. Dje i dha urdhër mediave që të gjithë ata që kanë marrë dosjet e hakeruara, që ta dinë qytetarët shqiptarë, një është për Damian Gjiknurin, e dyta është për Klodian Allajbeun dhe e treta është për një vajzë, Ornela Imeraj, që është një njeri i besuar i Klodian Allajbeut. Këto janë tre dosjet që janë hakeruar dhe janë shpërndarë,” tha gazetari Koka.
Ai shtoi se SPAK mori vendimin për bllokimin e publikimit të këtyre materialeve, por jo për përgjimet e Veliajt: “Si ka mundësi që SPAK jep urdhër për bllokimin e tre dosjeve që janë hakeruar dhe nuk jep urdhër, siç ka dhënë edhe në raste të tjera, për bllokimin e publikimit të përgjimeve të Erion Veliajt në burg? Me këtë SPAK-u konfirmoi që është edhe një organ në luftën e brendshme të PS-së.”
Koka bëri edhe një pretendim tjetër të fortë, duke sugjeruar se prapa grupit kriminal që ka kryer hakerimin qëndron ish-ministri i Brendshëm Fatmir Xhafaj, vëllai i trafikantit të drogës Geron Xhafaj. Megjithatë, ai e quajti absurde idenë se persona të afërt me Xhafajn, si Agim Ismaili, mund të jenë të përfshirë drejtpërdrejt në aktin e hakerimit.
