Vetëm pak minuta para afatit të fundit të dorëzimit të listës me kandidatët për deputet në zgjedhjet e 25 prillit, situat në selinë e Partisë Socialiste nuk duket aspak e qetë.
Mësohet se midis Edi Raës dhe Ditmir Bushatit ka pasur një debat për sa i përket mospërfshirjes së këtij të fundit në lista. Mësohet se Bushati i ka thënë Ramës se angazhimi i tij politik nuk mbaron me kaq e se do të vazhdoj të jetë aktiv.
“Unë do vazhdoj te jem aktiv ne mjedisin publik. Ju keni menduar se kjo është skuadra fituese, por aktiviteti nuk lidhet me partinë domosdoshmërish. Angazhimi im politik nuk mbaron këtu”, mësohet se ka deklaruar Bushati.
Nga ana tjetër Rama i ka thënë Bushatit se nuk ia ka pasur fajin Partia Socialiste dhe se është koha të kontribuojë për të.
“Betejën e ke braktisur vetë. S’ta ka fajin Partia Socialiste. Të ka dhënë gjithçka Partia Socialiste dhe është koha të kontribuosh për PS”, ka thënë Rama.
Ndërkohë, aspak e qetë ka qenë edhe situata me Pandeli Majkon, për të cilin mësohet se nuk e ka pranuar vendin e 19-të në listën e Tiranës. Figura të tjera të njohura nuk do të kandidojnë për PS në zgjedhjet e 25 prillit mes të cilëve Eglantina Gjermeni, Vasilika Hysi, Sadi Vorpsi, Besnik Baraj etj.
