Qeveria anuloi ditën e djeshme tenderin për dhënien me qira të kabinave në zonën e ‘Syrit të Kaltër’ për 600 mijë lekë në muaj.
Agjencia e Zonave të Mbrojtura ndërkohë, ka shpallur sot një tender për hartimin e një plani menaxhimi për të gjithë zonën.
Plan i ri përfshin përmirësimi e aspekteve fizike, sociale, ekonomike dhe ekologjike të zonës, shkruan ‘Shqiptarja.com’.
Fondi limit i përcaktuar është 5.8 milion lekë dhe afati për dorëzimin e ofertave është data 12 nëntor 2019 ora 12:00.
Shoqëria shtetërore, ‘Albtourist Tour Operator’ u shkri nga qeveria, pasi nuk kishte marrë masa për përmirësimin e kushteve në këtë zonë, si dhe tentoi t’i japë privatit me qira kabinat.
Mirëpo ‘Syri i Kaltër’ kontrollohet nga Agjencia e Zonave të Mbrojtura, e cila duhet të thotë fjalën e fundit.
‘Syri i Kaltër’ është shpallur zonë e mbrojtur në vitin 2002.
Ai shtrihet në një sipërfaqje prej 180 ha, përfshi këtu edhe sipërfaqen ujore të burimit.
Me një thellësi mbi 50 m, ‘Syri i Kaltër’ është një pikë turistike mjaft tërheqëse dhe është furnizuesi kryesor i lumit të Bistricës.
Aktualisht në këtë zonë ndodhet edhe një pikë biletarie, që është jashtë standardeve të kërkuara.
Në dokumentin e tenderit thuhet, se një problem tjetër i madh është edhe rruga tepër e amortizuar.
Gjithashtu mungon infrastruktura për turistët, përfshi këtu tualetet dhe koshat e plehrave.
