Policia ka dalë me një njoftim zyrtar sa i takon ngjarjes së ndodhur në Pogradec, ku u raportua se një person ka mbetur i plagosur në këmbë dhe ishte paraqitur në spitalin e qytetit.
Sipas njoftimit zyrtar, shkak për plagosjen e shtetasit J.M është bërë një konflikt i çastit me shtetasit F.B dhe G.M të cilët janë shpallur në kërkim.
Sipas burimeve plagosja në Pogradec ka ardhur si pasojë e një konflikti disa vjeçar mes personave me precedentë kriminalë. Ngjarja e ndodhur ditën e sotme ka lidhje me atentatin e dy viteve me parë ku u qëllua drejt hotel Voloreka nderkohë që ishte i mbushur me pushues. I plagosur në këmbë ka mbetur djali i pronarit të hotelit, Joan Muçallari i cili u dyshua si shënjestër e atentatit të mëparshëm. Dyshimet për ditën e sotme janë se njëri nga autorët është një nga personat e përfshirë edhe në atentatin e vitit 2020.
Dy autorët e shpallur në kërkim nga policia janë shtetasit Firdeus Berberi, Gresi Maxhari.
Ndërkohë më herët, policia doli me njoftim zyrtar ku ndryshe nga çfarë u mësua së funmdi, raportohet se konflikti kishte qenë i çastit dhe nuk kishte pasur histori të mëparshme të përplasjeve.
Njoftimi i Policisë:
Pogradec
Plagosën me armë zjarri gjatë një konflikti të çastit një shtetas, identifikohen dhe shpallen në kërkim dy autorët e dyshuar të ngjarjes.
Më datë 25.04.2022, rreth orës 16:00, në Spitalin e Pogradecit është paraqitur për mjekim, jashtë rrezikut për jetën, i dëmtuar në këmbë shtetasi J. M., i cili dyshohet të jetë plagosur në lagjen “Voloreka”, me armë zjarri tip pistoletë, gjatë një konflikti të çastit, nga dy shtetas të tjerë.
Menjëherë në vendngjarje, kanë shkuar shërbimet e policisë dhe nga veprimet e para u bë e mundur identifikimi i dy autorëve të dyshuar konkretisht shtetasit F. B. dhe G. M.
Nga ana e Policisë janë ngritur pika kontrolli dhe po punohet për kapjen e tyre dhe sqarimin e rrethanave të ngjarjes.
