Artan Murtaj, 43 vjeç, është vënë në pranga nga Policia e Sarandës, si i dyshuar për përkrahjen e autorëve të një plagosjeje të ndodhur më 17 korrik 2025.
Ngjarja ndodhi në lagjen nr. 3 të qytetit, ku u plagosën me armë zjarri dy shtetas: Gëzim Hajdaraj, 33 vjeç dhe Ernest Lamaj, 25 vjeç, të dy banues në Kamzë.
Murtaj ishte shpallur në kërkim pas lëshimit të urdhrit të ndalimit nga Prokuroria e Sarandës më 19 korrik dhe arrestimi i tij erdhi si rezultat i hetimeve të specializuara të Policisë për Krimet e Rënda.
Ndërkohë, autoritetet vijojnë të kërkojnë tre persona të tjerë të përfshirë në ngjarje: Ramadan Zoto (i njohur edhe si Ramadan Canaj), 43 vjeç, Erjon Canaj, 36 vjeç dhe Klaus Jaçaj, 31 vjeç. Sipas hetimeve, Ramadan Zoto është autori i dyshuar i plagosjes me armë zjarri.
Të plagosurit u dërguan fillimisht në Spitalin e Sarandës dhe më pas, për trajtim më të specializuar, në Spitalin e Traumës në Tiranë.
Sipas informacioneve paraprake, ngjarja dyshohet se ka ndodhur pas një konflikti për një sipërfaqe toke në zonën bregdetare të Sarandës.
Hajdaraj dhe Lamaj pretendojnë se vëllezërit Canaj u kishin zënë një pjesë të tokës në pronësi të tyre. Pas përpjekjeve për një takim për sqarim, situata ka degjeneruar në përplasje të armatosur.
Policia po vijon hetimet për të zbardhur plotësisht rrethanat dhe për të bërë të mundur kapjen e autorëve të mbetur në kërkim.
