Gjykata ka dhënë ditën e sotme masën e sigurisë “arrest me burg”, për Ndriçim Tahiri(Jonuzin), ndërsa ka lënë në “arrest shtëpie” Dorian Troplin dhe Markel Shtyllën, dy personat e tjerë të përfshirë në ngjarje. Ndriçim Jonuzi, pas një konflikti të çastit plagosi me armë zjarri aktivistin e Partisë Demokratik, Bledar Okshtuni në ambientet e selisë së PD-së në qytetin e Kavajës. Ky i fundit, u dërgua në spitalin e Durrësit, pasi u lëndua në këmbë. Sherri fillimisht sipas raportimeve, ka nisur nga Dorian Troplini dhe Marekl Shtylla, ku pas konfliktit fizik, ka degjeneruar deri në përdorimin e armës, nga ana e Jonuzit.
Për ngjarjen, reagim pati dhe nga kampet politike. Lulzim Basha ditën e ngjarjes u nis urgjentisht për në Kavajë, nga ku edhe dënoi aktin e kryer ng ambështetësi i Partisë Socialiste. Gjithashtu, një veprim të tillë ndoqi edhe Presidenti i Republikës Ilir Meta, ku dhe i bëri thirrje prokurorisë dhe policisë të hetojnë çështjen. Reagime ka pasur edhe nga kreu i KQZ-së, Ilirjan Celibashi i cili në një konferencë për mediat, ku është shprehur se udhëheqësit politikë kanë shumë në dorë dhe i ka kërkuar Ramës, Metës e Bashës që të jenë sa më të qetë duke u afrua zgjedhjet. Në fjalën e tij ai ka shtuar se të gjithë humbin nëse zgjedhjet bëhen nën tension.
