Policia e Dibrës ka vënë në pranga autorin e dyshuar të plagosjes me thikë të një 20-vjeçari, ngjarje e ndodhur dy ditë më parë në lagjen “Dobrovë” të Peshkopisë.
I arrestuari është shtetasi E. E., 19 vjeç, banues në Peshkopi. Sipas hetimeve paraprake, më 13 prill 2025, pas një konflikti për motive të dobëta, ai dyshohet se ka goditur me mjet prerës shtetasin E. Sh., 20 vjeç, i cili ka mbetur i plagosur rëndë.
Fatmirësisht, i riu ndodhet jashtë rrezikut për jetën dhe po merr trajtim mjekësor në spital.
Ndërkohë, tre persona të tjerë janë proceduar në gjendje të lirë, pasi nuk kanë kallëzuar ngjarjen pranë autoriteteve.
Materialet për këtë rast i janë referuar Prokurorisë së Dibrës, për veprime të mëtejshme ligjore, nën akuzën “Plagosje e rëndë me dashje”.
