Sot është zhvilluar seanca për vlerësimin e masës së sigurimit ndaj Adriatik Bodinit, 55-vjeçarit që tre ditë më parë goditi me thikë bashkëshorten e tij, Mirjana Bodini, në banesën e tyre në lagjen nr. 4 të qytetit të Sarandës.
Gjykata e Shkallës së Parë të Juridiksionit të Përgjithshëm Sarandë, nën drejtimin e gjyqtarit Mexhit Doçi, e cilësoi të ligjshëm arrestimin në flagrancë të të dyshuarit.
Prokurorja e çështjes, Esmeralda Basho, mbështeti qëndrimin e policisë për ndalimin e tij dhe kërkoi vendosjen e një mase të rreptë sigurie.
Në përfundim të seancës, gjykata vendosi masën “arrest në burg” për Adriatik Bodinin, duke e konsideruar të nevojshme për shkak të rrezikshmërisë së veprës penale “plagosje e rëndë me dashje”, e parashikuar nga neni 88/2 i Kodit Penal.
Gjatë seancës gjyqësore, Bodini e pranoi aktin e kryer, duke deklaruar se ngjarja ndodhi pas një konflikti të momentit me bashkëshorten. Ai punon si ndërtues dhe së fundmi kishte qenë i angazhuar në Piqeras.
Nga ana tjetër, Mirjana Bodini, 51 vjeçe dhe mësuese me profesion, ndodhet ende në spitalin e Vlorës nën kujdesin e mjekëve. Çifti ka një djalë.
Ngjarja ka shkaktuar reagime të shumta në Sarandë, duke rikthyer në vëmendje shqetësimin për rastet e dhunës në familje. Hetimet për këtë ngjarje të rëndë vijojnë.
