Mesditën e sotme janë dëgjuar të shtëna me armë zjarri pranë stacionit të Trenit në qytetin e Shkodrës. Në një njoftim zyrtar policia bën me dije se ka mbetur i plagosur Mark Molla, drejtor i Ujësjellësit si dhe djali i tij.
Policia njofton se ka vënë në pranga autorin 43-vjeçar, i identifikuar me inicialet M. P i cili është kapur pak pas plagosjes bashkë me pistoletën.
Ngjarja ka ndodhur pasditen e sotme, rreth orës 16:00, në lagjen “Mark Lula” ku autori i identifikuar me inicialet M. P., tashmë i prangosur nga Policia, ka shkuar para banesës së Mollës dhe ka plagosur babë e bir me pistoletë.
Të dy janë nisur menjëherë për në spitalin e Shkodrës për të marrë ndihmën e parë mjekësore, ku edhe ndodhen jashtë rrezikut për jetën.
Ndërkohë grupi hetimor ndodhet në vendngjarje dhe vijon punën për sqarimin e plotë të rrethanave të ngjarjes.
Njoftimi i policisë
Shkodër
Plagosi me armë zjarri pas një konflikti të çastit, Drejtorin e Ujësjellësit në Bashkinë Shkodër dhe djalin e tij, kapet dhe prangoset në kohë rekord autori, falë reagimit të menjëhershëm dhe profesional të Policisë.
Rreth orës 16:00, në lagjen “Mark Lula”, në Shkodër, shtetasi M. P., para banesës së tij, pas një konflikti për motive të dobëta me shtetasin M. M, me detyrë Drejtor i Ujësjellësit në Bashkinë Shkodër dhe djalin e tij K. M., i ka plagosur të dy me armë zjarri pistoletë.
Shtetasi M. M. dhe djali i tij K. M. janë transportuar menjëherë në Spitalin Rajonal Shkodër, ku ndodhen jashtë rrezikut për jetën.
Policia e Shkodrës dhe strukturat e DVP Shkodër, me marrjen e njoftimit, shkuan menjëherë në vendngjarje, duke bërë rrethimin e zonës dhe falë veprimeve të shpejta dhe profesionale bënë kapjen dhe arrestimin në flagrancë të autorit, shtetasit M. P, 43 vjeç, të cilit në momentin e kapjes shërbimet e Policisë i gjetën dhe sekuestruan edhe armën me të cilën ky shtetas plagosi shtetasit M. M. dhe K. M.
Grupi hetimor ndodhet në vendngjarje dhe vijon punën për sqarimin e plotë të rrethanave të ngjarjes.
