Një ngjarje e rëndë ka tronditur Fierin mbrëmjen e së dielës, ku një 40-vjeçar i identifikuar si Gledi H. është plagosur rëndë me armë zjarri nga 25-vjeçari Klement Beqaj.
Burimet bëjnë me dije se shkak për ngjarjen tragjike është bërë një lidhje intime midis autorit dhe bashkëshortes së të plagosurit, Melisa Beluli, 29 vjeç, e cila ndodhej në proces divorci me 40-vjeçarin.
Edhe pas disa ditësh nga plagosja, gjendja e viktimës vijon të jetë kritike për jetën.
Vëllai i të plagosurit, në një lidhje telefonike për emisionin “Me Zemër të Hapur” në News 24, ka kërkuar drejtësi për vëllanë e tij, duke akuzuar ish-bashkëshorten për braktisjen e fëmijës dhe përshkallëzimin e situatës që çoi në tragjedinë.
“Jam i tronditur se si një nënë mund të lërë bashkëshortin të shtrirë në rrugë dhe të largohet me të dashurin. Nuk e kuptoj se si mund të braktisë edhe fëmijën e saj në një situatë të tillë. Si prind, nuk do ta bëja kurrë një gjë të tillë. Kërkoj drejtësi për tim vëlla,” – u shpreh ai.
Ngjarja ka ngjallur reagime të forta në opinionin publik, ndërsa policia po vijon hetimet për zbardhjen e plotë të saj.
Ndërkohë, autori i plagosjes është shpallur në kërkim dhe forcat e rendit janë duke vijuar operacionet për kapjen e tij.
