Komisioni Qendror i Zgjedhjeve ka publikuar të dhënat e para mbi pjesëmarrjen në zgjedhjet parlamentare të 11 majit.
Deri në orën e parë nga hapja e qendrave të votimit, pjesëmarrja rezulton të jetë 1.81%, bazuar në raportimet e 937 qendrave votimi që kanë transmetuar informacionin në KQZ.
Në krahasim me zgjedhjet lokale të mbajtura dy vite më parë, kjo përqindje paraqet një rritje të lehtë, ndërsa është ndjeshëm më e ulët se në zgjedhjet e përgjithshme të katër viteve më parë, kur pjesëmarrja në orën e parë të procesit arriti në 3.37%.
Sot, rreth 3.7 milionë qytetarë shqiptarë janë thirrur të votojnë për të zgjedhur 140 deputetët që do të përbëjnë legjislaturën e re të Kuvendit.
Procesi i votimit ka nisur në orën 07:00 dhe do të vijojë deri në orën 19:00.
Një risi e rëndësishme e këtyre zgjedhjeve është përfshirja e diasporës shqiptare në procesin zgjedhor.
Për herë të parë, emigrantët kanë pasur mundësinë të regjistrohen dhe të votojnë nga jashtë vendit, përmes një platforme të dedikuar.
Janë regjistruar 245,935 votues nga diaspora, të cilët pritet të ndikojnë në formësimin e përfaqësimit parlamentar.
Në këtë garë elektorale marrin pjesë 11 subjekte dhe koalicione politike, me kandidatë të përfshirë në lista të hapura dhe të mbyllura, që konkurrojnë për shumicën në Kuvendin e ardhshëm.
