Kryebashkiaku i Lezhës, Pjerin Ndreu, është vënë nën hetim nga Prokuroria e Posaçme Kundër Korrupsionit dhe Krimit të Organizuar (SPAK) me akuzën e shpërdorimit të detyrës. Denoncimi ndaj tij është bërë nga Partia Demokratike e Lezhës në lidhje me një tender të dhënë në këtë qytet.
Në një deklaratë për mediat pas daljes nga SPAK, Ndreu sqaroi se ishte nën hetim për shpërdorim detyre, por theksoi se kjo nuk kishte të bënte me korrupsion apo shkelje të barazisë në tendera. “Është një kallëzim politik, por që nuk ka të bëjë fare me efekte korrupsioni, apo shkelje barazie në tendera, përveç se shërbimi në komunitet që kemi bërë ne, në një zonë në Lezhë, që nuk i ka shkuar për shtat PD-së,” tha Ndreu.
Sipas tij të qenit person nën hetim nuk do të thotë që është i akuzuar dhe shtoi se akuzat nuk kanë lidhje me lënien e mandatit të kryebashkiakut. “Pse e paragjykon lënien e mandatit. Nuk ka lidhje as me lënien e mandatit. Ajo që kam bërë unë është detyra në shërbim të komunitetit,” theksoi Ndreu.
Në lidhje me thirrjet e mundshme nga SPAK, Ndreu u shpreh i gatshëm të paraqitet sa herë që të jetë e nevojshme. “Sa herë të më thërrasin do të jem këtu, sidomos kur faktin ka lidhje me një shërbim në komunitet, më kanë në çdo orë të ditës. Jam votues dhe mbështetës i kësaj prokurorie,” tha ai.
I pyetur nëse mendonte se SPAK do të ngrejë akuza ndaj tij, Ndreu tha se nuk e shihte të arsyeshme, por shtoi se do të përballet me to nëse do të ngrihen. “Ta shohim, këtu jemi, do ta shohim. Unë për vete nuk e shoh të arsyeshme që të ngrejnë akuza. Por nëse do të ngrihen do të përballemi,” përfundoi Ndreu.
