Ditën e sotme Zyrat e Agjencisë Shtetërore të Kadastrës në Pogradec janë mbyllur për shkak të përhapjes së Covid-19.
Sipas Dosja.al bashkëshorti i një punonjëseje në këtë institucion ka rezultuar pozitiv me Covid-19 ditë më parë dhe është i shtruar në kryeqytet.
Kështu, kjo zyrë është mbyllur, dhe puna do të rifillojë pas disa ditësh.Ndërkohë ka filluar procesi i dezinfektimit në ambientet e zyrave dhe punonjësja është në pritje të përgjigjes së tamponit. Bashkë me të janë futur në karantinë edhe disa punonjës të tjerë, të cilët në varësi të kontakteve, do të bëjnë edhe ata testin.
Gjatë 24 orëve të fundit në vendin tonë janë kryer 820 testime për vlerësimin e infektimit nga virusi SARS COV2, dhe 133 persona janë konfirmuar pozitivë me COVID-19.
Në dy spitalet COVID, gjatë 24 orëve të fundit nuk e kanë fituar dot betejën me sëmundjen; një 56 vjeçar nga Tirana, një 70 vjeçare nga Elbasani, një 77 vjeçar nga Durrësi, një 87 vjeçar nga Fieri.
