Gjykata e Posaçme ka pezulluar për një vit gjyqin për Mikael Qosjan, i njohur edhe me mbiemrat Kamami dhe Stefo.
Ky vendim është marrë pasi ende nuk është ekzekutuar urdhri i gjykatës për arrestimin e tij, ndërsa pezullimi i afateve të gjykimit do të jetë në fuqi deri në marrjen e dijenisë për procesin nga ana e të pandehurit.
Qosja dyshohet se është një nga autorët e vrasjes së trefishtë që ndodhi në Dhjetor të vitit 2018 në Bradashesh të Elbasanit, ku u ekzekutuan Endrit Alibej, Arben Dylgjeri dhe shtetasi turk, Erdal Durunay.
Sipas hetimeve, vrasja ishte pjesë e një hakmarrjeje, me Endrit Alibejn, vëllain e të penduarit të drejtësisë, Erion Alibej, që ishte ndër personat e përfshirë. Dy të tjerët ishin gjithashtu rreth familjarë të tyre.
Qosja, i dyshuar se strehohet në Spanjë, është shpallur në kërkim që nga viti 2021, kur Prokuroria e Elbasanit nisi hetimet. Ato hetime zbuluan se vrasja u krye në bashkëpunim me persona të tjerë si pjesë e një grupi kriminal. Për këtë arsye, dosja kaloi më pas në Prokurorinë e Posaçme, e cila në shkurt të këtij viti kërkoi që Qosja të gjykohej për vrasje ndaj dy ose më shumë personave, vjedhje me dhunë, armëmbajtje pa leje dhe pjesëmarrje në grup kriminal.
