Ujësjellësi i Durrësit, ka bërë me dije, se të gjithë qytetarët që kanë braktisur shtëpinë nga tërmeti, mund t’i pezullojnë kontratat e furnizimit me ujë.
Kjo procedurë do të bëhet falas dhe dokumentet e vetme që duhet të paraqisni janë libreza e ujit dhe një kartë identiteti.
Afati për pezullimin e kontratave do të jetë deri më 31 janar të 2020-ës.
Në lidhje me faturën e nëntorit, UKD bën me dije, se nuk do të aplikohen kamatat në rast vonese.
“Ujësjellës Kanalizime Durrës njofton të gjithë abonentët të cilët janë larguar nga banesat e dëmtuara nga tërmeti i 26 nëntorit se mund ti pezullojnë kontratat e furnizimit me ujë me UKD duke filluar që nga ky muaj. UKD bën me dije se pezullimi i kontratës do të jetë falas (ndërkohë që më parë ky veprim kushtonte 2000 lekë). Për pezullimin e përkohshëm të kontratës abonentët duhet të paraqiten personalisht pranë zyrave të UKD-së dhe të kenë me vete librezën e ujit dhe kartën e identitetit. Afati për pezullimin e kontratave është deri në 31 janar 2020. Në lidhje me pagesën e faturës për muajin nëntor, UKD njofton se nuk do të aplikohet kamatë në rast të vonesës nga ana e qytetarëve, duke pasur parasysh problemet e shfaqura nga pasojat e tërmetit”, njofton UKD.
Tërmeti i 26 nëntorit la pas 51 të vdekur dhe qindra të plagosur.
Gjithashtu mijëra qytetarë humbën shtëpitë dhe janë strehuar në hotele apo çadra.
