Gjykata e Posaçme ka sqaruar arsyet pse vendosi pezullimin nga detyra dhe bllokimin e pasaportës për zëvendëskryeministren Belinda Balluku. Vendimi, i siguruar përmes gazetares Klodiana Lala, tregon se sipas gjykatës ekziston rreziku që ajo të ndikojë në marrjen e provave, për shkak të funksioneve që ushtron.
Në dokument thuhet se Balluku mund të ndërmarrë të njëjtat procedura që më herët kanë rezultuar në shkelje ligjore, duke cenuar procesin hetimor. Gjykata ka arsyetuar se bllokimi i pasaportës është vendosur pasi e pandehura mund të largohet nga Shqipëria.
Në vlerësimin për pezullimin, GJKKO thekson se ekziston rreziku që të kryhen sërish veprime të të njëjtit karakter me ato për të cilat po hetohet, duke pasur parasysh procedurat e dyshuara të paligjshme në disa tendera. Po ashtu nënvizohet fakti që të pandehurit administrojnë fonde të tjera publike dhe kanë në duar investime të vazhdueshme, gjë që e thellon nevojën e masave të sigurimit.
Gjykata ka cituar nenin 229 të Kodit të Procedurës Penale për të shpjeguar se masa e sigurisë caktohet duke u bazuar në nevojat konkrete të procesit, proporcionalitetin, përsëritjen e veprës dhe rrethanat rënduese apo lehtësuese. Sipas këtij vlerësimi, masat ndaj Belinda Ballukut, Gentian Gjylit dhe Erald Elezit konsiderohen të domosdoshme për garantimin e hetimit.
Balluku po hetohet për tenderin e tunelit të Llogarasë dhe për lotin numër katër të Unazës së Madhe. Akuza lidhet me shkelje të barazisë në tendera. Një ditë më parë, GJKKO vendosi arrest shtëpie për dy bashkëpunëtorët e saj të afërt, Gentian Gjylin, drejtues i ARRSH, dhe Erald Elezin, administrator i KESH.
Në një tjetër sqarim të bërë publik, gazetarja Klodiana Lala ka bërë me dije se gjykata ka konfirmuar ekzistencën e rrezikut për prishje ose asgjësim të provave. Për shkak të detyrave të saj si zëvendëskryeministre dhe ministre e Infrastrukturës dhe Energjisë, Balluku mund të ndërhyjë në mënyrë që të vështirësojë marrjen e provave.
Gjithashtu, GJKKO vlerëson se ekziston rreziku që ajo të kryejë sërish të njëjtën vepër, pasi vazhdon të mbikëqyrë procedura tenderuese për të cilat është nën hetim.
Sipas gjykatës, rreziku i largimit nga vendi lidhet me marzhin e mundshëm të dënimit. Për veprën penale në fjalë parashikohen deri në pesë vite burg, por kur vepra kryhet në bashkëpunim dhe është e përsëritur, dënimi rritet ndjeshëm, çka e rrit mundësinë e shmangies së procesit penal.
