Pesë vjet nga viktima e parë e Covid-19: A jemi gati për një pandemi tjetër?

Pesë vjet më parë, më 11 janar 2020, bota regjistroi vdekjen e parë nga koronavirusi SARS-CoV-2 në Kinë, duke hyrë në një krizë globale të paprecedentë.

Sot, ekspertët dhe organizatat ndërkombëtare si OBSH analizojnë nëse njerëzimi është më i përgatitur për përballjen me pandemitë e ardhshme.

Vlerësimi i OBSH-së

Drejtori i Përgjithshëm i OBSH-së, Tedros Adhanom Ghebreyesus, në një konferencë në dhjetor deklaroi se përgjigja nëse bota është më e përgatitur është “po dhe jo”.

Ai theksoi se, megjithëse janë marrë masa të rëndësishme për përmirësimin e mbrojtjes kundër pandemive, ekzistojnë ende dobësi serioze.

Maria Van Kerkhove, drejtuese e Departamentit të Përballimit të Epidemive në OBSH, paralajmëroi se pandemia e ardhshme është një çështje kohe.

Ajo tha se, megjithëse janë bërë përmirësime, bota nuk është ende e përgatitur sa duhet për një shpërthim të madh të një sëmundjeje të re infektive.

Paneli i Pavarur për Përgatitjen dhe Reagimin ndaj Pandemive, krijuar nga OBSH, nxori në pah pabarazitë globale në qasjen ndaj vaksinave dhe ilaçeve, duke e cilësuar këtë si një pengesë të madhe për përgatitjen e duhur ndaj krizave të ardhshme.

Në mënyrë të ngjashme, epidemiologia amerikane Meg Scheffer shprehu skepticizëm:

“Të jem e sinqertë, nuk mendoj se jemi më të përgatitur sesa ishim gjatë COVID-it. Autoritetet shëndetësore ende nuk kanë kapacitetin e nevojshëm për të mbledhur dhe shpërndarë shpejt të dhënat mbi patogjenët e rinj”, tha ajo.

Pesë vjet pas shpërthimit të pandemisë së COVID-19, përgatitja globale për pandemitë mbetet një sfidë e hapur.

Ndërsa disa përmirësime janë bërë, sfidat si pabarazitë dhe dobësitë në sistemet shëndetësore kërkojnë përpjekje të vazhdueshme për të mbrojtur njerëzimin nga krizat e ardhshme./DW