Policia ka zbardhur pjesërisht atentatin ndaj 29-vjeçarit Ermir Dedja, i vrarë më 20 maj në lagjen nr.18 të Durrësit, pranë banesës së tij.
Hetimet kanë çuar në identifikimin e pesë personave të dyshuar si të përfshirë në ngjarje, ndërsa dy prej tyre janë arrestuar dhe tre të tjerë janë shpallur në kërkim.
Të arrestuarit janë Erion Ndoni, 36 vjeç dhe Klodian Berisha, 35 vjeç, të cilët akuzohen për kontrabandë të dy automjeteve tip “Seat”, njëri prej të cilëve rezulton të jetë përdorur nga autorët e atentatit.
Automjeti tjetër u sekuestrua si provë materiale dhe dyshohet se do të përdorej për një ngjarje kriminale të planifikuar në vijim.
Ndërkohë, policia ka shpallur në kërkim 33-vjeçarin Xhuljano Dyrmishi, i dyshuar për sigurim të kushteve dhe mjeteve materiale për kryerjen e vrasjes dhe kontrabandë mallrash.
Ai është i treti në listën e të kërkuarve, pas dy personave të tjerë, një shqiptar dhe një shtetas maroken, të shpallur në kërkim vetëm dy ditë pas atentatit.
Sipas hetimeve, marokeni ka sjellë njërin prej automjeteve nga jashtë, përmes portit të Durrësit, vetëm një ditë para vrasjes. Të dy dyshohen se kanë ndihmuar në ndërtimin e logjistikës së atentatit dhe janë larguar drejt Italisë pas ngjarjes.
Automjeti i përdorur për atentatin u gjet i djegur në zonën e Gërdecit. Ekspertët kanë sekuestruar disa gjurmë dhe janë në pritje të rezultateve të analizave laboratorike për të identifikuar autorët direktë të vrasjes.
Hetuesit po ndjekin disa pista hetimore, përfshirë hakmarrjen dhe konfliktet për pazare të prishura droge.
Këto pista lidhen me të kaluarën kriminale të viktimës, i njohur si anëtar i grupit të Avdulajve në Durrës. Në vitin 2015, Dedja u arrestua pasi u kap duke shitur drogë për një grup që planifikonte trafikimin e saj drejt Kosovës.
Dy vite më pas, u ndalua sërish, këtë herë për ndihmë ndaj një personi të shpallur në kërkim për një plagosje me armë në Shijak.
