Dhjetëra qytete në Evropën Jugore përballen me valë të nxehti ekstrem. Autoritetet shëndetësore kanë ngritur alarmin për rreziqet që sjellin temperaturat e larta, të cilat pritet të vazhdojnë edhe ditët në vijim.
Në disa zona të Spanjës termometri ka kaluar 40°C, ndërsa Portugalia, Franca dhe Italia kanë vënë në gatishmëri shërbimet mjekësore për shkak të rrezikut nga goditjet e nxehtësisë. Në ishullin italian të Siçilisë dhe në Greqi po përballen edhe me zjarre.
Edhe Shqipëria po përjeton temperatura mbi mesataren për këtë periudhë të vitit.
Meteorologët paralajmërojnë se vala e nxehtësisë do të vazhdojë për disa ditë të tjera.
Grupi më i rrezikuar: të moshuarit
Nxehtësia ekstreme mund të përkeqësojë sëmundjet kardiovaskulare dhe ato të frymëmarrjes. Ekspozimi i gjatë ndaj diellit rrit rrezikun për djegie të lëkurës, ndërsa qëndrimi gjatë në temperatura të larta mund të shkaktojë hipertermi, një gjendje e ngjashme me ethet.
Nxehtësia e madhe ndikon edhe në lëkurë dhe indet e trurit, duke rritur rrezikun për meningjit aseptik, një infeksion truri që nuk shkaktohet nga bakteret, kjo është një formë e goditjes së izoluar nga nxehtësia në kokë.
Sipas studimeve, më të prekshmit janë personat mbi 65 vjeç.
Çfarë na pret këtë verë?
Ekspertët parashikojnë që temperaturat do të rriten edhe më shumë, duke e bërë motin potencialisht më të rrezikshëm dhe me pasoja serioze për shëndetin.
Ndryshimet klimatike globale po çojnë në rritje të temperaturave në gjithë botën, por në Evropë kjo rritje po ndodh dy herë më shpejt se mesatarja globale.
Masa të domosdoshme për përballimin e nxehtësisë
Sipas ekspertëve, qeveritë duhet të veprojnë urgjentisht për të parandaluar pasojat e nxehtësisë. Kjo përfshin përmirësimin e sistemit të paralajmërimeve për valët e nxehtit dhe sigurimin e hapësirave publike me ajër të kondicionuar, të cilat mund të shpëtojnë deri në 100 mijë jetë të parakohshme në gjithë botën.
