Rreth 170 abetare njeh historia e gjuhës shqipe, por që nga ky vit shkollor klasat e para në Shqipëri e Kosovë do të mësojnë me të njëjtën abetare.
Ndërkohë ditën e sotme është përuruar sot në Gjakovë, abetarja e përbashkët Shqipëri-Kosovë. Gjatë fjalës së saj Ministrja e Arsimit, Evis Kushi pohoi se ky tekst do të fshijë kufijtë mes Shqipërisë dhe Kosovës.
Ministrja Kushi theksoi se ishte krenare për gjuhën shqipe, për të cilën tha se tani po mësohet jo vetëm në Kosove dhe në Shqipëri, por në mbarë botën ku ka shqiptarë. “Shumë njerëz ishin skeptike, që ne do ta realizonim këtë nismë. Jo thjesht një abetare të re, por një abetare cilësore dhe që reflekton të gjitha shqetësimet.
Kur ka bashkëpunim asgjë nuk është e pamundur. Kjo abetare do të fshijë kufijtë mes Shqipërisë dhe Kosovës. Ky është libri që do ta na bashkojë më shumë dhe forcojë më shumë dashurinë për njëri-tjetrin. Jemi një komb dhe kemi një gjuhë.
Edhe Faik Konica ka thënë e vetmja lidhje që i ka mbajtur të lidhur shqiptarët ka qenë gjuha shqiptare.
Për ne nuk ka krenari më të madhe sesa gjuha shqipe. Sa shumë histori me shkronjat shqipe. Ne kemi organizuar një ekspozitë me të gjitha abetaret, më shumë se 100 abetare. Unë jam krenare që gjuha shqipe mësohet jo vetëm në Shqipëri dhe Kosovë, por edhe në Universitetet më prestigjioze në botë. Së fundmi gjuha shqipe do të mësohet në Universitetin e Harvardit”, deklaroi ministrja.
