Partia Liberale, nën drejtimin e Mark Carney, ka dalë fituese në zgjedhjet federale në Kanada, duke i hapur rrugë formimit të një qeverie të re.
Në fjalimin e tij të parë si kryeministër i sapozgjedhur, Carney dha mesazhe të forta uniteti dhe vendosmërie, duke iu drejtuar qytetarëve me pyetjen retorike:
“Kush është gati të mbrojë Kanadanë me mua?-një deklaratë e ngarkuar me simbolikë, në një kohë tensionesh në rritje me Shtetet e Bashkuara.
Ai bëri thirrje për ndërtimin e një Kanadaje më të fortë dhe më të bashkuar, duke theksuar se vendi ka hyrë në një fazë sfidash të mëdha që kërkojnë vizion dhe qëndrueshmëri.
“Kush është gati ta ndërtojë Kanadanë të fortë?” – vijoi Carney, i shoqëruar nga brohoritjet e të pranishmëve.
Në vijim, ai shprehu mirënjohje për familjen dhe bashkëpunëtorët e tij, duke theksuar se mbështetja e gruas dhe fëmijëve e ka frymëzuar për t’i shërbyer vendit.
Një pjesë e rëndësishme e fjalës së tij u përqendrua te vlerat që do të udhëheqin mandatin e tij: përulësia, ambicia dhe uniteti, vlera që tha se i ka përvetësuar që nga fëmijëria dhe që dëshiron t’i rikthejë në qeverisje.
Por pjesa më e drejtpërdrejtë e fjalimit erdhi në trajtimin e marrëdhënieve me SHBA-në. Carney nuk kurseu kritikat, duke akuzuar Uashingtonin për tentativë të hapur ndaj burimeve dhe sovranitetit të Kanadasë.
“Amerika dëshiron tokën tonë, burimet tona, vendin tonë por kjo nuk do të ndodhë kurrë,” u shpreh ai, duke e cilësuar përfundimin e integrimit tradicional me SHBA-në si një “tragjedi historike”.
Sipas tij, Kanadaja po kalon një moment vendimtar, në të cilin duhet të qëndrojë e bashkuar përballë sfidave dhe të mbrojë interesat e saj kombëtare.
Ai konfirmoi se së shpejti do të zhvillojë një takim me presidentin Trump, për të diskutuar të ardhmen e dy shteteve si kombe të pavarura.
“Kanadaja do të marrë drejtimin, nëse SHBA heq dorë nga udhëheqja globale,” deklaroi ai mes duartrokitjeve të mbështetësve.
Në përmbyllje, Carney nënvizoi angazhimin e qeverisë së re për të transformuar Kanadanë në një superfuqi energjetike dhe për të hapur vende të reja pune.
“Ne nuk jemi thjesht një vend, jemi një federatë. Jo gjithmonë të përsosur, por gjithmonë të përkushtuar ndaj drejtësisë,” tha ai. “Dhe mbi të gjitha, ne vendosim çfarë ndodh këtu.”
