Policia e Kosovës ditën e sotme zhvilloi një operacion të madh anti-kontrabandë dhe gjatë aksionit u sulmua nga disa banorë serbë.
Në lidhje me këtë ka reaguar edhe Presidentja e Kosovës, Vjosa Osmani. Me anë të një postimi në rrjetet sociale Osmani u shpreh se lufta ndaj krimit të organizuar nuk është nën siglën e përkatësisë etnike, por nën siglën e përkatësisë së grupeve kriminale. Ajo ka shtuar ndër të tjera se kushdo që tenton ta paraqesë ndryshe, sipas saj është në krah të grupeve kriminale.
“Lufta kundër krimit të organizuar është e pakompromis dhe e panegociueshme. Të negociosh e të bësh kompromis me krimin është të bëhesh njëri prej tyre. Prandaj aksioni i sotëm i policisë dhe doganës së Kosovës, i autorizuar nga institucionet e drejtësisë, nuk mund të quhet “aksion në veri”, sepse ai ishte aksion në pjesë të ndryshme të Kosovës, ndaj personave të etnive të ndryshme, e që të përbashkëtën e kishte kontrabandën dhe krimin e organizuar.
Ky lloj i krimit ka qenë gjithnjë multietnik. Disa shqiptarë në jug e disa serbë në veri e persona të etnive të tjera, shpeshherë të ndihmuar nga politikanë të caktuar, ka vite që kanë organizuar këtë krim. Por, ato ditë kanë perënduar. Lufta ndaj krimit të organizuar nuk e ka siglën e përkatësisë etnike, por siglën e përkatësisë në grupe kriminale. Kushdo që tenton ta paraqesë ndryshe, është ndihmëtar ndaj grupeve kriminale, të cilat BE-ja ka dy dekada që po kërkon t’i luftojmë.
Tani që kjo luftë ndaj krimit është e vertetë, e pakompromis, dhe e panegociueshme, presim që BE të qëndrojë besnike ndaj vlerave të sundimit të ligjit të cilat vetë i përfaqëson,” ka shkruar presidentja.
