Një përplasje me armë zjarri ndodhi ditën e djeshme rreth orës 19:45, në zonën e plazhit të vjetër në Vlorë. Për pasojë 3 persona mbetën të plagosur.
Mësohet se në mesnatë ka ndërruar jetë shtetasi Arben Beqiraj. Bashkë me të u plagosën edhe Egert Beqiraj dhe Nesim Hodaj të cilët janë jashtë rrezikut për jetën.
Viktima kishte 6 plumba në trup, në pjesën e barkut, në duar, në këmbë, por një plumb në pjesën e kraharorit i shkaktoi plagën më të madhe, ndaj humbi edhe jetën.
Dy atentatorët tashmë janë identifikuar nga policia dhe janë në kërkim. Ata janë shtetasit SH.L., dhe E.XH.
Dy autorët janë konfliktuar fillimisht me fjalë me pronarin e lokalit. Më pas ata kanë ushtruar dhunë fizike, duke u përleshur të dyja palët.
Pas konfliktit fizik dy autorët kanë shkuar tek makinat e tyre të parkuara jashtë lokalit nga ku kanë marrë një kallashnikov dhe një pistoletë me të cilat kanë qëlluar drejt Beqirajt, djalit dhe nipit të tij.
Ngjarja ka tronditur pushuesit, të cilët janë larguar me vrap në mjetet e tyre për të mos i kapur plumbat.
Lidhur me ngjarjen e rëndë, një dëshmitar okular ka treguar sesi ndodhi sherri që çoi deri në humbjen e një jete. Dëshmia e këtij personi është shpërndarë në të gjitha mediat, ku tregohet se pronari i lokalit i kishte kërkuar një personi që po kalonte me kalë në mes të pushuesve, që të tregonte më shumë kujdes pasi aty kishte edhe shumë fëmijë.
Gjithashtu, dëshmitari shton se pronari, Arbeni, e kishte goditur edhe me pëllëmbë personin që e kishte kritikuar.
Pas kësaj, kishin ardhur një grup njerëzish të cilët fillimisht kishin debatuar me pronarin e lokalit për të sqaruar edhe situatën e ndodhur.
Gjithë skena është parë nga pushuesit, ndërsa Arbeni mori më shumë se katër plumba, ka treguar dëshmitari ocular.
