BRUKSEL
Ministrat e jashtëm të Bashkimit Evropian zhvilluan bisedime urgjente të premten për tensionet aktuale ushtarake midis Greqisë dhe Turqisë për të drejtat e shpimit në Mesdheun lindor.
Presidenti turk Rexhep Tajip Erdogan kishte thënë se do të vazhdonte rrugën përpara në kërkim të naftës dhe gazit, në ujërat e diskutueshme deri në 23 gusht ashtu siç ishte planifikuar, shkruajnë mediat europiane.
Por pas bisedimeve me Gjermaninë, ai sinjalizoi që Ankaraja dhe Berlini kishin rënë dakord për një “zbutje” të pozicioneve pas kësaj date. Nuk kishte të dhëna nëse Athina kishte rënë apo jo dakord në lidhje me këtë çështje.
Erdogan ka paralajmëruar, megjithatë, se Turqia do iu përgjigjej fuqimisht, çdo lloj ngacimi të mundshëm nga ana e Greqisë.
Turqia ka një anije kërkimore të shoqëruar nga dy anije luftarake që kërkojnë në mes Qipros dhe ishullit grek të Kretës, ndërsa Greqia vendosi anijet e saj detare në zonë.
Ministri i Jashtëm grek, Nikos Dendias udhëtoi në Vjenë të premten për të takuar Sekretarin e Shtetit Amerikan Mike Pompeo dhe Ministrin e Jashtëm austriak Aleksandër Schallenberg.
Dendias tha se shpresonte për një rezolutë, por shtoi se pyetja duhej t’iu shtrohej “turqve”. Departamenti i Shtetit tha se Pompeo dhe Dendias diskutuan “nevojën urgjente për të zvogëluar tensionet në Mesdheun Lindor”.
Ministri i Jashtëm gjerman Heiko Maas, vendi i të cilit mban presidencën e rradhës të BE, tha përpara bisedimeve se “provokimet” që po ndodhin në Mesdheun lindor “nuk mund të vazhdojnë”.
“As shpimi turk nuk mundet,” tha ai. “Ne po punojmë drejt një dialogu të drejtpërdrejtë midis palëve që do të kontribuonte në gjetjen e një zgjidhjeje për këtë çështje,” shtoi Maas, duke thënë se nuk duhet të ketë shpime për gaz a naftë gjatë bisedimeve.
