Lidhur me përplasjet e sotme në Elbasan mes militantëve të dy partive kryesore në vend, ka reaguar edhe kryeministri Edi Rama.
Me një mesazh në “Twitter” , Rama thotë se në 20 vjet nuk kishte parë një turmë ulëritëse me flamuj partie, teksa nuk ngurron të përmen dhe presidentin Meta. Për kreun e PD, Rama thotë se kishte parkuar makinën në korsinë e biçikletave dhe ishte fshehur mes tyre.
“Kjo shfaqje vulgare është një tjetër shembull i degradimit të një opozite demode, e cila ka në krye një kukull në duart e Saliut&Ilirit, që duan sherr e përçarje, për të marrë peng Shqipërinë e drejtësinë!Keqardhje e madhe për #PD e kthye në vegël e dy hallexhinjve të drejtësisë!
Tash 20 vjet që vij në ditën e verës në Elbasan, s’kisha parë një turmë ulëritëse me flamuj partie, si ai automobili zhurmues i filmit “Koncert në vitin 36″! Dukeshin si 100 kopje të Ilir Metës, ndërsa Luli kishte parkuar makinën në korsinë e bicikletave e ishte fshehur mes tyre!”, shkruan Rama.
Lidhur me këtë ngjarje ka reaguar më herët dhe lideri demokrat, Lulzim Basha. Ai thotë se Rama provokoi qytetin e Elbasanit duke treguar rëndimin që e ka kapluar, ndërsa bëri thirrje kreut të qeverisë që të heqë dorë nga shoqërimi me kriminelë, pasi nuk e tremb dot fuqinë e popullit.
