Reparti Shqiponja dhe FNSH, gjithashtu edhe forca të shumta policie kanë zbarkuar në fshatin Cakran të Fierit, në vendin ku u gjet lënda narkotike kanabis e mbjellë në kubik dhe ndodhi përplasja me armë.
Sipas burimeve policia po bën krehjen e zonës, ndërsa në terren ndodhen edhe krerët më të lartë të Drejtorisë së Policisë së Fierit. Menjëherë pas ngjarjes së rëndë, që ndodhi ditën e sotme në këtë zonë, ku pas një kontrolli rutinë të kryer nga SHÇBA në bashkëpunim me prokurorinë e Fierit po kryejnë hetime për grupin që zhvillonte kontrollin rutinë në territor, i cili zbuloi dhe lëndën narkotike të mbjellë në kubik për të parë edhe dinamikën e ngjarjes.
29-vjeçari nga Patosi Greseld Shpataraku, i cili mbeti i plagosur pas përplasjes me armë aktualisht ndodhet në reanimacionin e spitalit të Fierit nën kujdesin e mjekëve.
Njoftimi i Policisë
Në zbatim të planit të masave për kontrollin e territorit, me qëllim parandalimin e kultivimit të bimëve narkotike, grupi i kontrollit të territorit, i përbërë nga punonjës të Policisë të Komisariatit të Policisë Fier, gjatë kontrollit të territorit, në një zonë të pyllëzuar të fshatit Gjorgoz të Njësisë Administrative Cakran të bashkisë Fier, ka konstatuar një person që mbante në dorë një armë zjarri kallashnikov.
Punonjësit e Policisë i kanë bërë thirrje personit që të hidhte armën dhe mos të lëvizte, por shtetasi ende i paidentifikuar nuk i është bindur urdhrit të Policisë dhe ka drejtuar armën e zjarrit nga punonjësit e Policisë, duke e mbushur atë me qëllim që të qëllonte në drejtim të tyre.
Shërbimet e Policisë kanë ndërhyrë për ta neutralizuar dhe për pasojë shtetasi ka mbetur i plagosur, për momentin jashtë rrezikut për jetën.
Nga këqyrja e vendit të ngjarjes rezultoi se në afërsi të vendit ku u konstatua shtetasi me armë kishte dhe fidanë cannabis sativa të kultivuar në kubikë.
Në cilësinë e provës materiale është sekuestruar edhe arma e zjarrit kallashnikov.
Në drejtim të vendngjarjes ka shkuar grupi hetimor, i cili në bashkëpunim edhe me SHÇBA, nën drejtimin e Prokurorisë, vijon punën për zbardhjen e plotë të rrethanave të ngjarjes dhe identifikimin e personit.
