Katër persona janë vënë në pranga nga Policia e Vlorës, në lidhje me ngjarjen e ndodhur gjatë natës në aksin Levan-Vlorë.
Gjatë një konflikti për përplasjen e mjeteve, 25-vjeçari Engli Nake mbeti i plagosur.
Policia pas hetimeve, ka zbuluar, se pranë mbikalimit të Levanit, janë përplasur automjetet “Volkswagen Golf” dhe “Alfa Romeo”.
“Volkswageni” drejtohej nga E.B. dhe pasagjerë shtetasit E.Y. e Xh.T, ndërsa në mjetin “Alfa Romeo” shofer ishte Miri Tefai dhe pasagjerë, Sajdi Qarri dhe Engli Nake.
Këta persona filluan sherrin pranë një karburanti në Novoselë, ku Miri Tefai, në gjendje të dehur qëllon në ajër dhe plagos aksidentalisht kunatin, Engli Nake, i cili ndodhet jashtë rrezikut për jetën.
Pas zbardhjes së ngjarjes, policia vuri në pranga tre personat që ndodheshin në mjetin “Alfa Romeo”.
Gjithashtu u arrestua edhe roja i karburantit ku ndodhi konflikti, për moskallëzim krimi.
