Presidenti Ilir Meta ka reaguar në lidhje me protestat e ndodhura së fundi në bizneset në Lungomaren e Vlorës dhe përplasjet me policinë për orarin e mbylljes.
Në një postim në Facebook Meta shkruan se është duke e ndjekur me vëmendje situatën dhe i bën thirrje autoriteteve që të dëshmojnë përgjegjësinë e duhur në adresimin e çështjeve që shqetësojnë biznesin.
Meta thotë se protestat paqësore garantohen nga Kushtetuta dhe dhuna e pajustifkuar, veçanërisht ndaj grave dhe vajzave, është e papranueshme dhe e dënueshme. Ai shkruan se dialogu dhe bashkëpunimi ofrojnë mundësi për të arritur një zgjidhje të pranueshme.
Reagimi i plotë:
Duke ndjekur me vëmendje dhe vlerësuar situatën shqetësuese të krijuar mbrëmë në Vlorë, i bëj thirrje Policisë së Shtetit, autoriteteve dhe institucioneve përgjegjëse të dëshmojnë ndjeshmërinë dhe përgjegjësinë e duhur në adresimin e çështjeve, që shqetësojnë biznesin, në përputhje me kuadrin ligjor.
Protestat paqësore janë një e drejtë, që garantohet nga Kushtetuta.
Dhuna e pajustifikuar dhe shporporcionale ndaj sipërmarrësve dhe qytetarëve, në veçanti ndaj grave dhe vajzave është e papranueshme dhe e dënueshme.
Jo arroganca dhe arbitrariteti, por dialogu i sinqert dhe bashkëpunimi i ofruar nga shteti ofrojnë patjetër mundësi për arritjen e një zgjidhjeje të pranueshme.
Kurrsesi Vlora nuk e meriton një trajtim të tillë!
