Edhe kjo javë nuk ka nisur e qetë në qytetin e Shkodrës, pasi raportohet se dy persona janë përfshirë në një konflikt me armë të ftohta.
Shtetasi me iniciale J.M., 36 vjeç, ka plagosur me thikë për motive të dobëta shtetasin me iniciale E.C., 34 vjeç, të dy banues në Shkodër.
Ngjarja është bërë e ditur për policinë nga Spitali Rajonal i Shkodrës, ku ka shkuar për ndihmë mjekësore i plagosuri.
Mirëpo, ky i fundit refuzoi të tregonte për blutë të vërtetën e asaj çfarë kishte ndodhur, duke thënë se kishte bërë një aksident automobilistik, ku kishte marrë disa lëndime.
Pas hetimit të ngjarjes dhe verifikimit të fakteve, policia ka zbardhur ngjarjen dhe ka arrestuar më pas në flagrancë të dy shtetasit, ku autori akuzohet për ‘Plagosje të rëndë me dashje’, kurse i plagosuri për ‘Moskallëzim krimi’.
Materialet iu referuan Prokurorisë së Rrethit Gjyqësor Shkodër, për veprime të mëtejshme.
Njoftimi i policisë së Shkodrës:
Konfliktohen për motive të dobëta, njëri prej tyre plagoset me thikë e sende të forta gjatë konfliktit, por arrestohen të dy në flagrancë nga Policia.
Në sallën operative të DVP Shkodër ka ardhur njoftim nga Spitali Rajonal Shkodër se ka shkuar për ndihmë mjekësore një shtetas i dëmtuar me mjet prerës, i cili pas kontaktit me Policinë ka mohuar të jetë plagosur nga ndonjë person tjetër, por ka thënë se ishte dëmtuar aksidentalisht duke rregulluar mjetin.
Specialistët për Hetimin e Krimit në Komisariatin e Policisë Shkodër, bazuar në thëniet kontradiktore të këtij shtetasi, thelluan hetimet dhe falë veprimeve të shpejta u bë e mundur zbardhja e ngjarjes dhe ka rezultuar se:
Shtetasi Ë. (J.) M., 36 vjeç, banues në Shkodër, gjatë një konflikti për motive të dobëta ka plagosur me thikë e sende të forta shtetasin E. C., 34 vjeç, banues në Shkodër.
Në përfundim të veprimeve u bë arrestimi në flagrancë i shtetasit Ë. (J.) M., 36 vjeç, banues në lagjen ‘10 Korriku’, Shkodër, për veprën penale ‘Plagosja e rëndë me dashje’.
Gjithashtu, u bë arrestimi në flagrancë edhe i shtetasit E. C., 34 vjeç, banues në lagjen ‘Guerile’, Shkodër, për veprën penale ‘Moskallëzimi i krimit ‘.
Materialet iu referuan Prokurorisë së Rrethit Gjyqësor Shkodër, për veprime të mëtejshme.
