Policia e Tiranës ka arrestuar dy shtetas të shpallur më herët në kërkim për përndjekje përmes rrjeteve sociale.
Në pranga kanë rënë Klauden Muçogllava, 34 vjeç, dhe Egzon Poka, 28 vjeç, të dy të dyshuar për ngacmime të përsëritura ndaj ish-partneres së tyre.
Klauden Muçogllava, me precedentë penalë për përndjekjen e një të miture dhe për trafikim të lëndëve narkotike në vitin 2017, është kapur sërish pasi ka përsëritur të njëjtën vepër penale.
Ai akuzohet se ka përndjekur ish të dashurën në rrjete sociale, por edhe se ka tentuar ta kanosë atë përmes një veprimi kërcënues, duke lënë dy fishekë arme gjahu në oborrin e familjarëve të saj. Fishekët janë sekuestruar si provë materiale nga policia.
Ndërkohë, Egzon Poka është arrestuar pas një vendimi të Gjykatës së Tiranës, e cila ka caktuar ndaj tij masën e sigurisë “Arrest në burg”, për akuzën e “Përndjekjes”. Ai gjithashtu akuzohet se ka ngacmuar në mënyrë të përsëritur ish të dashurën e tij përmes rrjeteve sociale.
Të dy rastet u zbuluan si rezultat i hetimeve të mbështetura në informacione të siguruara nga inteligjenca policore.
Materialet përkatëse i janë referuar tashmë Prokurorisë së Tiranës për vijimin e procedurave ligjore.
