Bilanci i përmbytjeve katastrofike që goditën Teksasin është rënduar ndjeshëm, me të paktën 82 viktima të konfirmuara dhe dhjetëra persona që ende rezultojnë të zhdukur.
Ndër ta, 28 janë fëmijë në Qarkun Kerr, përfshirë 10 vajza dhe një këshilltare nga kampi i njohur “Mystic”, të cilat nuk janë gjetur ende.
Ndërkohë që operacionet e kërkim-shpëtimit vijojnë në disa zona të përmbytura, reshjet e shiut nuk kanë të ndalur. Rrugët në pjesët më të prekura të Teksasit Qendror, të cilat sapo kishin filluar të pastroheshin, janë mbuluar sërish nga uji për shkak të stuhive të reja.
Guvernatori i shtetit, Greg Abbott, paralajmëroi se rreziku nuk ka kaluar ende, pasi në ditët në vijim pritet një tjetër valë reshjesh të dendura, që mund të përkeqësojnë situatën.
Në Qarkun Kerr, ku ndodhet edhe kampi “Mystic”, autoritetet kishin diskutuar më herët mundësinë e instalimit të një sistemi sirenash për paralajmërim në rast përmbytjeje, por plani nuk u vu kurrë në zbatim.
Pavarësisht paralajmërimeve të shumta nga Shërbimi Kombëtar i Motit përpara se të godiste stuhia, po shtohen dyshimet dhe kritikat mbi kapacitetin e autoriteteve për të reaguar në kohë dhe për të arritur në mënyrë efektive banorët, veçanërisht në zonat më të izoluara.
Ndërkohë që numri i viktimave mund të rritet, përpjekjet për të gjetur të zhdukurit dhe për të rikuperuar zonat e shkatërruara po vazhdojnë me intensitet të lartë në të gjithë shtetin.
