Dita e sotme ka sjellë reshje të shumta shiu dhe erë të fortë në gjithë Shqipërinë. Reshjet vazhdojnë në bashkinë e Shkodrës dhe Malësisë së Madhe, por deri më tani nuk raportohet për probleme të mëdha.
Në disa fshatra të Vaut të Dejës, si Njad Hajmel, Vig Mnele, Temal dhe Shllak, ka pasur mungesë të energjisë elektrike për shkak të kushteve të motit. Pavarësisht kësaj, autoritetet po punojnë për rikthimin e furnizimit me energji.
Gjithashtu, në Pukë, reshjet e shiut dhe era e fortë vazhdojnë, por nuk raportohet për dëme apo vështirësi në qarkullim. Në Fushë Arrëz janë regjistruar rënie të gurëve dhe dherave në rrugët rurale, por pastrimi i rrugëve është bërë nga punëtorët e firmave mirëmbajtëse, duke mundësuar që qarkullimi të vijojë normalisht.
Pavarësisht kushteve të vështira të motit, situata në shumicën e territoreve mbetet e kontrolluar dhe autoritetet janë angazhuar për menaxhimin e situatës.
