Rajoni stërvitor i Bizës ishte skena e fazës përmbyllëse të stërvitjes shumëkombëshe “Defender 2025”, ku drejtuesit më të lartë të Forcave të Armatosura shqiptare ndoqën nga afër demonstrimet taktike dhe angazhimin e trupave në terren.
Në këtë aktivitet morën pjesë Shefi i Shtabit të Përgjithshëm të FA, gjenerallejtënant Arben Kingji, Komandanti i Forcës Tokësore, gjeneralmajor Ilir Xhebexhia, Komandanti i Forcës Ajrore, gjeneralmajor Ferdinant Dimo, dhe Drejtori i Shtabit të Përgjithshëm, gjeneralbrigade Ardian Lilo.
Përmes një prezantimi gjithëpërfshirës, gjeneralbrigade Lilo ofroi një pasqyrë të detajuar mbi organizimin e stërvitjes “Defender 25”, që nga faza përgatitore dhe konferencat planifikuese, deri te pjesëmarrja ndërkombëtare, objektivat strategjike, kapacitetet e përfshira dhe mësimet e nxjerra nga operacioni.
Aktiviteti përmbyllës u finalizua me një drekë të përbashkët me trupat, si shenjë vlerësimi dhe motivimi për kontributin e tyre në këtë angazhim të rëndësishëm ushtarak.
