Kryeministri i Shqipërisë, Edi Rama, kërkon nga qytetarët shqiptarë që të vaksinohen sa më parë të jetë e mundur. Përmes një postimi në rrjetet sociale, kreu i qeverisë fton qytetarët të shfrytëzojnë deri në fund muajin hapur të vaksinimit.
Edi Rama shprehet se varianti i ri i koronavirusit, “Delta”, po shqetëson të gjitha vendet e botës dhe mënyra më e mirë për t’u mbrojtur, është vetëm vaksinimi.
Postimi i kryeministrit Edi Rama:
“MIRËMËNGJES dhe me ftesën për çdo qytetar për të shfrytëzuar deri në fund MUAJIN E HAPUR TË VAKSINIMIT, edhe sepse situata e epidemisë në vend me variantin e ri të koronavirusit, i cili po shqetëson seriozisht të gjitha vendet, kërkon prej të gjithëve një akt moral e qytetar për mbrojtjen e shëndetit, po edhe të të tjerëve, ju uroj një ditë të mbarë. Vaksinimi ndaj Covid-19 bëhet në qendrat shëndetësore”, shkroi kryeministri i vendit.
Varianti “Delta” po qarkullon prej disa muajsh dhe është kthyer në një rrezik të madh për shoqërinë. Mjaftom të shikojmë shifrat në rritje ditë pas dite për të kuptuar se ky variant, po përhapet me shpejtësi. Muaji gusht është muaji i hapur i vaksinimit dhe apeli për vaksinimin masiv për qytetarët, nuk ka munguar nga drejtuesit e shtetit.
